В.И.Ленин музейи

Архитекторлор С.Абышев, Р.Асылбеков, В.Иванов, К.Ибраев. М.Сатыбалдиев, А.Куделя, М.Керимкулов. Долбоордун жетекчиси В.Анистратов, 1984-ж. 80-жылдары шаардын жакшы жабдылган жана эл жашаган аймагынын ордуна жаңы борбордун чоң курулушу башталган. Долбоордун авторлор тобунун жетекчилери Н.Уллас жана Г.Кутателадзе болушту. Монументалдык курулуштар үчүн кеңири жайлар тазаланып, бүтүндөй кварталдар талкаланган. Бир нече жаңы көп кабаттуу турак-жайлар жана административдик имараттар бузулган. Панфилов атындагы сейил багынын бир бөлүгү, шаардык стадион, ачык асман алдындагы эң чоң залы бар жайкы театр, «Кыргызстан» мейманканасы, офицерлер үйү талкаланган. Шаардык оазистердин арасында майрамдык салтанаттарда же элдик толкундоолор учурунда гана жанданган адамдын колунан жаралган чөл пайда болгон. Ак үйдүн жана музейдин бети жок мрамор текчелери, маал-маалы менен күйгүзүлгөн фонтандар, Лениндин алп эстелиги – мына ушулардын баары Ала-Тоо аянтынын кооз жерлери.